«حسام كان هيموت».. 4 رسائل ونصيحة من إبراهيم حسن بعد اقتراب رحيلهما

أثارت رسائل إبراهيم حسن، مدير منتخب مصر الأول لكرة القدم، حالة من الجدل في الشارع المصري، بعدما استقر اتحاد الكرة المصري لكرة القدم على إقالة الجهاز الفني لمنتخب مصر بقيادة حسام حسن المدير الفني.

وكان «بوابة مصر الجديدة» قد انفرد منذ يومين باتخاذ قرار داخل اتحاد الكرة برحيل الجهاز الفني، بقيادة حسام حسن، بعد الأزمات الأخيرة الخاصة بمدرب المنتخب الأول.

وكتب إبراهيم حسن، عبر صفحته على «فيس بوك»: «اتقوا الله في مصر ليه عايزين تكسروا فرحة الناس الطيبة والأطفال اللي رجعوا يحفظوا تشيرت وشعار منتخبهم وألوان وعلم مصر، اسألوا المصريين المغتربين عن أطفالهم اللي كانو قربوا ينسوا ألوان وشكل علم بلدهم، افتكروا لمة الشعب وفرحتهم أثناء وبعد كل مباراة افتكروا احترام العالم كله لمنتخب مصر».

وأضاف: «افتكروا حسام حسن، المخلص والمحب لبلده اللي بينتحر علشان يفرح بلده»، موضحًا: «من منا بلا أخطاء ولا ابتلاء في حياته ورغم كل ظروفه الخاصة عند شغله واسم بلده بيفصل وبيرمي كل حاجه ورا ضهره».

وواصل إبراهيم حسن: «ليه بنتحارب بالشكل ده عند كل موقف ليه قبل كل معسكر بيتعلن علينا الحرب الشرسة».

وأكمل: «ليه الغل من زمايل لينا؟ كنا بناكل في طبق واحد، وكنا حاملين شعار واحد، وهو علم مصر».

وأردف مدير منتخب مصر: «ليه الغل من معظم الإعلاميين، والحرب والهجوم غير المبرر في كل صغيرة وكبيرة، والتقليل من أي نجاح بنعمله؟ ليه بنكبر الصغير على الكبير، وبننسى الأصول اللي الشعب المصري متربي عليها».

وأكمل: «نصيحة ورسالة للزملاء اللي نفسهم يبقوا في مكاننا. نجاحنا أنا وحسام هو اللي هيديك الفرصة بعد كده تبقى موجود مكاننا، علشان اللي بياخد القرار يبقى مطمئن من تجربتنا ويديك فرصتك من غير ما يخاف. وننسى الأجنبي، لكن لو أنا فشلت، مش هتجيلك الفرصة».

وأشار إلى إصابة شقيقة حسام حسن بذبحة صدرية، خلال معسكرات ومواجهات المنتخب الوطني، وقال: «معلومة ما كنتش عايز أقولها. هل تعلم أن حسام أُصيب أكتر من مرة أثناء المعسكرات والمباريات والتصفيات؟ مرة بذَبحة، واتلحق بالصدمات في آخر لحظة».

وأكد: «بعدها بفترة صغيرة عمل دعامات، وبعدها بشهر دخل غرفة العمليات تاني، وفضلت مستنية يطلع من غرفة العمليات».

وأكمل: «وفضلت منتظره يطلع من غرفة العمليات وقعدوا يقولوا أي حاجة علشان ماتخضش والحمد لله طلع وبرضوا ماقدرش ايه سبب المده ده كلها بعدها بأيام روحت المستشفي اعمل تحاليل عاديه قابلت الدكتور بالصدفة اللي عمل العملية قالي كنت مخبي عليك سبب التأخير إني حسام، بنسبه كبيره ماكانش هايطلع من غرفة العمليات عايش لأنها كانت في شرايين القلب وكانت معقده جدا».

واختتم مدير منتخب مصر حديثه قائلًا: «ومن المواقف مباراة البرازيل بعد العملية ماكانش قادر يمشي ولا يقف وكان الوضع صعب علشان الكاميرات واللعيبه مايحسوش بحاجة ويأثر عليهم معنويا قولتله يقعد وأصر يقف على الخط».

يذكر أن الاتحاد المصري لكرة القدم، سوف يعقد اجتماعًا اليوم السبت، لاتخاذ القرار النهائي بشأن مصير الجهاز الفني لمنتخب مصر.