«الزمالك كده يتعملهم تمثال وبيراميدز مش قصة فلوس».. شوبير يهاجم الأهلي

شن أحمد شوبير حارس مرمى الأهلي ومنتخب مصر السابق هجوما على النادي الأهلي بعد التعادل مع القناة 3-3 مؤكدا أن هناك شيء خاطيء داخل النادي مشيدا في الوقت نفسه بمتصدر الدوري فريق بيراميدز والمنافس التقليدي الزمالك.

وقال أحمد شوبير في تصريحات إذاعية اليوم الخميس: "محدش يقول لي إن الأهلي مرهق عشان راجع من أوغندا محدش يقول الكلام ده خالص الأهلي رايح في طيارة خاصة وراح المباراة ولعب ورجع ومكنش فيه مشاكل خالص".

وأوضح شوبير: "طيب أنا همشي معاك في إللي أنت بتقوله كده، هو مش بيراميدز كده برضه راح جنوب السودان، والزمالك مش راح أوغندا وطيران عادي مش خاص، ده بيراميدز رجع يدوب اتمرن تمرينة كسب طلائع الجيش 4 وقبلها سيراميكا 4، وهو أقوى دفاع وهجوم وداخل مرماه 3 أهداف الأهلي داخل مرماه 6 أهداف، فريق مكتمل محوط على نفسه".

وتابع شوبير: "وقول لي أيه الإضافات اللي على بيراميدز الموسم ده المهاجم الجزائري نذير أبوعلي ومش بيلعب أساسي لكن لما بيلعب بيجيب أجوان، وخالد عوض من طلائع الجيش عشان بس محدش بس يقول لك معاهم فلوس وبيدفعوا وبيعملوا، يا جماعة ده أوباما اكتشاف السنة دي الراجل موكوينا موظفه في مكان جديد والولد بيجيب أهداف وبيصنع أهداف".

وأضاف شوبير: "لازم إدارة الأهلي تقف مع نفسها وتشوف الأخطاء اللي جوه الأهلي ليه اللاعيبة وصلت للحالة دي لا فيه روح ولا مبالاة، والجماهير هتموت ومستحملة صحيح الجماهير إمبارح مكانتش كثير بس لو فيه فرد واحد في المدرج لازم تحترمه".

وواصل شوبير: "أنت عندك لغبطة فيه سيستم عايز يتظبط، أنتوا مش حاسين إن الموسم اللي قبل اللي فات الفرقة خدت الدوري بما يشبه المعجزة، وبعدها مشيت كولر وغيرت كذا مدرب، ودلوقتي الحسين عموتة والضغط قوي عليه وبتقولوا مشيه، ومشيت كام مدير كرة حضرتك: محمد رمضان على خالد بيبو على وليد صلاح الدين على محمد يوسف يعني غيرت مدربين ومدرين كرة، وأجهزة فنية، وأيه النتيجة أنت المستوى في النازل".

وضرب شوبير مثالا بالمنافس متابعاً: "الزمالك دول يتعمل لهم تمثال ده مفيش فرقة، بيزيرا مشي وحسام عبدالمجيد مشي وقبلهم ناصر ماهر ونبيل عماد دونجا وكلهم كانوا بيلعبوا أساسيين، وسيف الدين الجزيري عقده خلص ومشي وإصابات موجودة بالجملة في الفريق، لكنه كسب بترول أسيوط وقبلها كسب الجيش في رواندا، وبيراميدز فريق مميز جدا، ومتقعدش تقول لنفسك ده بيراميدز فيه صرف وفلوس ومش عارف أيه".