«عمري ما أنسى الفضل».. ناصر منسي يوجه رسالة لجماهير الزمالك بعد أزمة إلقاء قميص الفريق على الأرض

نشر ناصر منسي، مهاجم الزمالك، بيان اعتذار بعد لقطة احتفاله المثير للجدل عقب تسجيل هدف الفوز أمام الجيش الرواندي، أمس الجمعة، في دور الـ32 من بطولة دوري أبطال إفريقيا.

وأثار احتفال ناصر منسي بهدفه أمام الجيش الرواندي الجدل، بعدما خلع قميصه وألقاه أرضًا، فيما أشارت تقارير إلى أن تصرفه حمل رسائل موجهة إلى معتمد جمال، المدير الفني للزمالك.

وكتب ناصر منسي عبر حسابه على منصة «إنستجرام»: «بيان اعتذار إلى جمهور نادي الزمالك العظيم. جمهور الزمالك العظيم بيتي وأهلي وسندي بعد ربنا».

وأضاف: «أنا بكتب الكلام ده وأنا حاسس إني لازم أعتذر لكل زملكاوي زعل مني بسبب رمي التيشيرت. كان تصرف غلط، وأنا بعتذر عنه بكل صدق، ومهما كان الضغط أو الانفعال اللي كنت بمر بيه، ده مش مبرر للتصرف ده، وأنا متقبل أي عقوبة».

وأكمل: «نادي الزمالك وجمهوره ليهم فضل كبير عليَّ بعد ربنا، وعمري ما أنكر فضل المكان اللي اداني الثقة والفرصة، ولا أنسى حب الجمهور اللي دايمًا كان سند ليا. كل هدف بجيبه، وكل نجاح بوصل له، وراه فضل ربنا ودعم النادي وجمهوره وزمايلي وكل الناس اللي واقفة جنبي».

وتابع: «أنا واحد منكم، والزمالك بالنسبالي مش مجرد نادي، الزمالك بيت وعيلة وانتماء، وناصر منسي عمره ما ينسى فضل الزمالك وجمهوره. إحنا عيلة واحدة، ومهما حصل مش هنسمح لأي حاجة أو لأي حد يفرق بينا. يمكن نختلف أو نزعل، لكن اللي بينا أكبر من أي موقف، وحب الزمالك هو اللي بيجمعنا دايمًا».

وأتم: «حقكم عليَّ، وبعتذر لكل زملكاوي زعل مني، وإن شاء الله أرد الاعتذار ده في الملعب بأدائي واجتهادي، وأفضل عند حسن ظنكم بيا. عاش الزمالك، وعاش جمهوره العظيم. جمهور الزمالك دايمًا في القلب».