بعد تصريح «اللي يقولي العمالة اليومية هديله بالشبشب».. هاشتاج ’’#داليا_البحيري_انتي_كومبارس‘‘ يجتاح السوشيال ميديا.. والفنانة ترد

كتب: ضياء السقا

تعرضت الفنانة ​داليا البحيري​ لهجوم كبير بعد انتقادها المواطنين الذين لم يلتزموا بحظر التجوال، مناشدة الرئيس السيسي بتطبيق الحظر الكامل، قائلة: «اللي يقولي العمالة اليومية هديله بالشبشب على بقه.. معظم المؤسسات بدأت تشحت عليهم، يعني هيلاقوا ياكلوا».

تصريحات البحيري أثارت موجة غضب على السوشيال ميديا، بسبب إهانتها للعمالة اليومية، مما دفع رواد تويتر لتدشين هاشتاج "#داليا_البحيري_انتي_كومبارس"، للهجوم عليها.

وشنت الفنانة هجوماً لاذعاً على المواطنين الذين يخالفون تعليمات وإجراءات الدولة المصرية للوقاية من فيروس كورونا المستجد، وذلك بعد تداول مشاهد تكدس وزحام في العتبة والموسكي.

وكانت الحكومة قد اتخذت عدداً من الإجراءات في إطار سعيها للحفاظ على صحة المواطنين من خطر الإصابة بالفيروس، منها حظر التجمعات، والنزول إلى الشوارع، وحظر التجوال الجزئي.

وقالت داليا، في منشور عبر صفحتها الشخصية على موقع "فيس بوك": "مبقاش أنا محبوسة في البيت أنا وأهلي داخلين على 36 يوم وزينا ناس محترمة كتير، ولو لا قدر الله حد فينا تعب مانلاقيش سرير في مستشفى عشان واحد حيوان كان مقضيها خروج بيتفسح ولا كان على باله اللي احنا فيه".

وأضافت: "حظر كامل يا ريس لو سمحت أرجوك، واللي حيقولي العمالة اليومية حديله بالشبشب على بقه أنا فاض بيا! أولا معظم المؤسسات الخيرية وبقول معظم مش كل بدأوا يشحتوا عليهم من قبل ما رمضان يبدأ، فمحدش يقولي مش حيلاقوا يأكلوا".

وتابعت داليا: "وكتير منهم بنتحايل عليهم يشتغلوا أصلا طول السنة! خلينا صادقين مع نفسنا شوية كدة والنبي! واللي بيشتغلوا في مصانع على عيني وراسي يتعملهم إقامة داخل محل عملهم! غير كدة احنا رايحين في داهية".

واختتمت الفنانة منشورها بالقول: "لحد دلوقتي ماشين بستر ربنا ومجهودات الدولة العظيمة اللي اتعملت في الأول، بس والله العظيم ده شعب ملوش كتالوج ده لازم يتربط في رجل السرير مش يتحبس بس".

داليا ترد على الهجوم

بعد ذلك ردت البحيري على الهجوم الذي تعرضت له، قائلة: "أنا مخرجتش من منزلي منذ 36 يوما، ومنشوري كان على حساب خاص للأصدقاء فقط".

وتابعت داليا: "أنا عملت بوست على برايفت أكونت والبوست كان للأصدقاء فقط يعني مش بابليك فا كنت بتكلم بأريحية كأني قاعدة مع أصحابي، لكن في صحفي عندي على الأكونت أخد الكلام ده واستقطع منه جملة تستفز الناس وحطها عنوان".

وواصلت: "أيوا ده الأكونت بتاعي وأنا ما قولتش حاجة أخجل منها أنا كل اللي طلبته في البوست إن يبقا في حظر كامل، لأن امبارح في ناس كتير جدا نزلت تتسوق في المولات والعتبة والموسكي، ده رد فعلي أنا وناس كتير جدا زيي عايزة تقول نفس الكلام، لكن كالعادة أي حد من الوسط بيتهاجم بشكل شرس مع إننا في خط الدفاع الأول في أي حاجة تواجه البلد".

وأضافت الفنانة: "لازم نبقا إيد واحدة، لازم نوعي الناس البسيطة.. بس لما الاقي الأفعال دي من ناس المفروض إنها مثقفة وفاهمة ومش مضطرة إنها تنزل خالص من البيت مش زي ما اتقال إني بهاجم العمالة اليومية ده مش حقيقي.. أنا من أول الناس اللي عملوا حملة مع بنك الطعام لدعم العمالة اليومية وفي مؤسسات كتير دعمتهم".

وختمت البحيري بالقول: "ما أظنش في أي حاجة من اللي أنا قولتها دي ممكن تضايق أي حد، وبعذر أي حد دخل وهاجمني وقال كلام مش مظبوط في حقي لأن العنوان اللي اتكتب فعلا مستفز".